Монгол Улсын гавьяат тамирчин М.Анхцэцэг их спортоосоо зодож тайлахаа мэдэгдэв
Нийгэм
Монгол Улсын гавьяат тамирчин М.Анхцэцэг их спортоосоо зодож тайлахаа мэдэгдэв. Тэрбээр өчигдөр Монгол телевизийн "Өнөө өглөө" хөтөлбөрийн зочноор уригдаж, ярилцах үеэрээ их спортоо орхиж байгаа тухайгаа зарласан. Хэдхэн хоногийн өмнө Бахрейны Манама хотод болсон ДАШТ-ээс огцом өргөлтөөр мөнгөн медаль хүртсэн билээ.
Тэрээр, Сүүлийн хоёр жил дексаметазон тариаг асар их тариулсан. Түнх рүүгээ 7 хоногт нэг удаа, эсвэл сард хоёр удаа гээд байнга хүчтэй тариа хийлгэж ирсэн. Одоо эрүүл мэнддээ, гэр бүлдээ анхаарах цаг ирлээ. Нөхрөө дэмжиж, эцэг эх, үр хүүхдэдээ цаг зарцуулж, амьдарч үзмээр санагдаж байна” гэв.
МОНГОЛ УЛСЫН ДЭЭД АМЖИЛТЫГ 91 ДЭХ УДААГАА ШИНЭЧЛЭН ТОГТООСОН
М.Анхцэцэг спортын замналынхаа 17 жилийн хугацаанд гурван олимп, найман удаагийн ДАШТ-д оролцсон юм. Тэрбээр Бахрейны Манамад болсон ДАШТ-д Монгол Улсын дээд амжилтыг 91 дэх удаагаа шинэчлэн тогтоосон.Түүний олон улсад үзүүлсэн томоохон амжилтыг дурдъя.
- 2014 он: Өсвөр үеийн Азийн АШТ-ий мөнгөн медаль
- 2014 он: Залуучуудын Азийн АШТ-ий хүрэл медаль
- 2015 он: “Дэлхийн цом”-ын тэмцээний хүрэл медаль
- 2016 он: Залуучуудын ДАШТ-ий алтан медаль (Монголоос анх удаа)
- 2016 он: Насанд хүрэгчдийн Азийн АШТ-ий алтан медаль (Монголоос анх удаа)
- 2016 он: “Рио-2016” олимпын наадмын шагналт VIII байр
- 2016 он: Залуучуудын Азийн АШТ-ий алтан медаль
- 2016 он: Оюутны ДАШТ-ий алтан медаль (Монголоос анх удаа)
- 2017 он: Залуучуудын Азийн АШТ-д хоёр дахиа түрүүлсэн
- 2017 он: Азийн танхимын болон тулааны спортын наадмын алтан медаль
- 2017 он: Насанд хүрэгчдийн ДАШТ-ий хүрэл медаль (огцом өргөлт)
- 2019 он: Насанд хүрэгчдийн Азийн АШТ-ий мөнгөн медаль
- 2019 он: Насанд хүрэгчдийн ДАШТ-ий хүрэл медаль (огцом өргөлт)
- 2019 он: “Дэлхийн цом”-ын тэмцээний алтан медаль
- 2020 он: “Токио-2020” олимпын шагналт IV байр
- 2021 он: Насанд хүрэгчдийн ДАШТ-ий мөнгөн медаль (огцом өргөлт)
- 2021 он: Насанд хүрэгчдийн ДАШТ-ий мөнгөн медаль (түлхэлттэй өргөлт)
- 2021 он: Насанд хүрэгчдийн ДАШТ-ий алтан медаль (нийлбэр дүнгээр)
- 2022 он: Насанд хүрэгчдийн ДАШТ-ий мөнгөн медаль (түлхэлттэй өргөлт)
- 2024 он: Насанд хүрэгчдийн ДАШТ-ий мөнгөн медаль (огцом өргөлт)
