Сэтгүүл зүйн салбарынхан Ноорог сайтын залуусыг "Үндэсний эв нэгдлийг бусниулах" гэсэн үндэслэлээр гэмт хэрэгт сэжиглэж, баривчилсан явдлыг эсэргүүцэж байна
Нийгэм
Хэвлэн нийтлэх эрх чөлөө боомилогдож буйг илэрхийлсэн олон тохиолдлууд бий ч энэ удаагийнх шиг "улаан цагаандаа гарсан" нь үгүй хэмээн хэвлэлийн салбарынхан Ноорог сайтынханыг хойшлуулшгүй хэмээн баривчилсан явдалд үгээ хэлж, эсэргүүцлээ илэрхийлж байна.
Үг хэлж, үзэл бодлоо илэрхийлэх, хэвлэн нийтлэх, хэвлэлийн эрх чөлөөний төлөө тогтмол үйл ажиллагаа явуулдаг хэвлэлийн редакциуд нэгдэхээ илэрхийлж байна.
Уг үйл явдалдтай холбоотойгоор салбарын мэргэжлийн байгууллагуудаас хамгийн анхлан Сэтгүүл зүйн Инноваци Хөгжлийн үүр төв албан ёсоор байр сууриа илэрхийлж, мэдэгдэл гаргаад байна.
Хараат бус хэвлэл мэдээллийн байгууллагыг залхаан цээрлүүлэх үйлдлийг эсэргүүцэж байна хэмээн үзэж буй юм.
Уг мэдэгдэлд,
2025.03.18, Улаанбаатар хот | Гуравдугаар сарын 17-ноос 18-нд шилжих шөнө Кибер гэмт хэрэгтэй тэмцэх газраас хойшлуулашгүй тохиолдол үүссэн гэж Ноорог хуудсын албан оффист нэгжлэг хийж, компьютер, хард тоног төхөөрөмж болон ажилтнуудын гар утсыг хураан авсан байна. Өмгөөлөгчгүй мэдүүлэг өгөхөөс татгалзсан 8 ажилтныг шөнийн 22:00 цагаас 07:00 цаг хүртэл саатуулжээ.
Юуны өмнө Ноорог хуудас нь сэтгүүл зүйн ёс зүйн хэм хэмжээний хүрээнд мэргэжлийн үйл ажиллагаа явуулж, нийтийн эрх ашгийн төлөө дөрөв дэх засаглалын үүргээ нэр төртэйгээр гүйцэтгэж байгаа залуу редакц билээ.
Олон нийтэд ил болсон мэдээллээр Ноорог редакцыг Эрүүгийн хуулийн 19.9 дүгээр зүйлийн 1 хэсэгт заасан Үндэсний эв нэгдлийг бусниулах гэмт хэрэгт сэжиглэж, ийнхүү хойшлуулашгүй ажиллагаа явуулсан байна.
Үндэсний эв нэгдлийг хэвлэлийн эрх чөлөөг боомилох зорилгоор урвуулан ашиглаж байгаад Сэтгүүл зүйн Инновац Хөгжлийн Үүр төв НҮТББ харамсаж байгаагаа илэрхийлж, хүний эрхийг дээдэлдэг ардчилсан Монгол Улсад байж болохгүй үйлдэл гэж үзэж байгаагаа үүгээр мэдэгдэж байна.
НҮБ-ын Хүний эрхийн хорооны 34-р ерөнхий тайлбар буюу Үзэл бодолтой байх, үзэл бодлоо илэрхийлэх эрх чөлөөний тайлбарт, “Хэвлэл мэдээллийн байгууллага, хэвлэлийн газар, сэтгүүлчдийг гагцхүү засгийн газар, түүний хэрэгжүүлж буй ул стөр, нийгмийн дэглэм, бодлогыг шүүмжилсний төлөө эрүүгийн хариуцлага хүлээлгэх нь үзэл бодол илэрхийлэх эрх чөлөөнд тавих зайлшгүй хязгаарлалт хэрхэвч биш юм” гэж дурдсан байдаг.
Одоогоор Ноорог редакцын ажлын тоног төхөөрөмжүүдийг хураан авсан байгаа бөгөөд тэд ажлаа үргэлжлүүлэн хийх боломжгүй нөхцөл байдалд хүрээд байна. Цаашлаад ажлын бус цагаар ийнхүү байцаалт явуулах нь хэвлэл мэдээллийг залхаан цээрлүүлэх шинж чанартай байх тул сүүлийн үед Монголд түгээмэл ажиглагдах болсон энэ арга барилыг эсэргүүцэж байгаагаа албан ёсоор илэрхийлж байна.
Ноорог редакц нь нийтийн эрх ашгийн төлөөх сэтгүүл зүйн үүргээ гүйцэтгэх хүрээнд сонгуулийн үеийг баримтжуулсан “18 хоног” баримтат нэвтрүүлгээ удалгүй түгээхээр бэлтгэн ажиллаж байсан юм.
Хэвлэл мэдээллийг дэмжих, хараат бус байдлыг нэмэгдүүлэх чиглэлээр үйл ажиллагаа явуулдаг манай байгууллага Ноорог редакцын ажлын тоног төхөөрөмжийг нэн яаралтай бүрэн бүтэн буцаан өгч, тэднийг бие даасан сэтгүүл зүйн үйл ажиллагаагаа үргэлжлүүлэн явуулах боломжоор хангахыг шаардаж байна.
