Бүгд найрамдах Тува улс Завхан аймгаас мах импортолно
Нийгэм
Завхан аймгийн Засаг дарга Г.Өнөрбаяр энэ сарын 20-21-ний өдрүүдэд ОХУ-ын Бүгд Найрамдах Тува Улсад ажиллав.
Тэрбээр Кызыл хотноо зохиогдсон “Агроинвест-2025” хөдөө аж ахуйн хөрөнгө оруулалтын чуулганд оролцож үг хэллээ. Чуулганд ОХУ, БНХАУ болон Увс, Завхан аймгийн хөдөө аж ахуйн салбарын төлөөлөл оролцсон байна.
Мөн Засаг дарга Г.Өнөрбаяр ОХУ-ын Бүгд Найрамдах Тува Улсын тэргүүн Ховалыг Владислава Товарищтайовичтай уулзалт хийжээ.
Уулзалтын үеэр Бүгд Найрамдах Тува улсын талаас өнгөрсөн жилийн уулзалтаар ярилцаж тохирсон ОХУ-аас Завхан аймагт шатахуун нийлүүлэх бэлтгэл ажил болгож, шатахууны жингийн төхөөрөмжөө Цагаантолгой боомтод суурилуулсан гэдгээ хэллээ. Түүнчлэн Цагаантолгой боомтын 11 км шороон замыг хучих, боомтод агуулах, ажлын байрууд барих, бараа солилцоотой холбоотой тоног төхөөрөмж суурилуулах ажлыг 2 жилийн хугацаанд хийж гүйцэтгэхээр болсноо хэлсэн байна.
Мөн Завхан аймгаас мах импортлох бэлтгэл ажлыг үндсэндээ хангаж дууссанаа мэдэгдлээ. Энэ хугацаанд Тува Улс төрийн болон хувийн хэвшлийн хамтарсан хөрөнгөөр мах боловсруулах 3 үйлдвэр барьж байгуулжээ. Мөн эдгээр махны үйлдвэрийн захирал болон бусад албаныхан ирэх 5 дугаар сард Завхан айммагт ирж хамтын ажиллагааны гэрээгээ байгуулахаар тохиролцсон байна.
Мөн уулзалтын үеэр аймгийн Засаг дарга Г.Өнөрбаяр Тува Улстай хамтын ажиллагаагаа өргөжүүлэх бэлтгэл ажлаа хангаж, Арц суурь боомтын бүтээн байгуулалтын зураг төслийг боловсруулж дууссан, засмал замын эхний хөрөнгө оруулалтын төсөв батлагдаж, замын бүтээн байгуулалт эхлэхээр болсныг мэдэгдлээ. Мөн тэрээр Тува Улс Завхан аймагтай соёл, боловсрол, аялал жуулчлалын чиглэлээр нийгмийн хамтын ажиллагаагаа үргэлжлүүлэхээс гадна эдийн засгийн томоохон харилцааг эхлүүлэх үндэс суурь тавигдаж байгааг онцлсон байна.
