ХУУЛЬ ЗҮЙН САЛБАРЫН ЭРХ ЗҮЙН ТУСЛАЛЦАА, ӨГӨГДЛИЙН УДИРДЛАГЫГ БЭХЖҮҮЛЭХ” ТӨСЛИЙГ АМЖИЛТТАЙ ХЭРЭГЖҮҮЛЛЭЭ
Нийгэм
Хууль зүй, дотоод хэргийн яамнаас Азийн хөгжлийн банктай хамтран “Хууль зүйн салбарын эрх зүйн туслалцаа, өгөгдлийн удирдлагыг бэхжүүлэх” төслийг Хууль зүйн туслалцааны төв, Шүүхийн шийдвэр гүйцэтгэх ерөнхий газар, Хууль зүйн үндэсний хүрээлэнд амжилттай хэрэгжүүлж, төслийн үр дүнг танилцуулах хаалтын арга хэмжээг өнөөдөр зохион байгууллаа.
Уг арга хэмжээнд Хууль зүй, дотоод хэргийн яамны Төрийн нарийн бичгийн дарга Н.Мягмар, Азийн хөгжлийн банкны Монгол Улс дахь Суурин төлөөлөгчийн газрын Азийн хөгжлийн банкны Монгол Улс дахь Суурин төлөөлөгчийн газрын Төсөл хөтөлбөрийн албаны дарга Чандра Мохан Арора , төслийг хэрэгжүүлэгч, гүйцэтгэгч байгууллагын удирдлага, албан хаагчид оролцлоо.
Энэхүү төслийн хүрээнд “Хууль зүйн туслалцааны нэгдсэн систем”-ийг шинээр хөгжүүлж, ашиглаж эхэлсэн бөгөөд тус систем нэвтэрснээр хууль зүйн туслалцааны нэгдсэн бүртгэл, мэдээлэл цахимжиж, тайлан мэдээ шуурхай, цогц байдлаар гаргах боломж бүрдсэн. Хууль зүйн туслалцааны нэгдсэн цахим системийн хувьд И-монголиа, Өрхийн мэдээллийн нэгдсэн систем, эрх зүйн мэдээллийн нэгдсэн систем зэрэг төрийн бусад байгууллагын системүүдтэй интеграци хийж, мэдээлэл авах боломжтой нь чухал давуу тал юм.
Түүнчлэн тус төвд шаардлагатай тоног төхөөрөмжийг нийлүүлж, техник хангамжийг сайжруулснаас гадна байгууллагын цахим хуудсыг шинэчлэх, албан хаагчдыг мэдээллийн аюулгүй байдал болон мэргэшлийн чадавхыг дээшлүүлэх сургалтад хамруулах зэрэг ажлыг төслийн санхүүжилтээр гүйцэтгэлээ.
