“Facebook”, “WhatsApp”, “Instagram”-ын үйл ажиллагаа 6 цаг доголдсоны эцэст хэвийн боллоо
Нийгэм
“Facebook”, “WhatsApp”, “Instagram” нийгмийн сүлжээний үйл ажиллагааг хэвийн болголоо гэж “Facebook” компани мэдээлэв.
Тодруулбал, “Facebook”-ийн эзэмшдэг эдгээр нийгмийн сүлжээний үйл ажиллагаа зургаан цагийн турш доголдож, вэб, ухаалаг гар утасны аль алинаар нь нэвтрэх боломжгүй болжээ.
Интернэтийн доголдлыг хянадаг “Downdetector” платформын мэдээлснээр, урьд хожид үзэгдээгүй хамгийн өргөн хүрээг хамарсан доголдол үүсэж, дэлхий даяар 10.6 сая гомдол ирүүлсэн байна. “Facebook”-т 2019 онд үүнтэй төстэй явдал тохиолдож байв. Тухайн үед “Facebook” болон бусад нийгмийн сүлжээнүүдэд 14 цаг нэвтрэх боломжгүй болж байсан юм.
Даваа гарагт нийгмийн сүлжээнүүдийн үйлчилгээ орон нутгийн цагаар 16 цагаас эхлэн доголдож, хэрэглэгчид ойролцоогоор 22 цагийн үеэс цахим хуудаснуудад эргэн нэвтэрч эхэлжээ. “Facebook” компанийн зүгээс ийм явдал гарсанд хэрэглэгчдээсээ хүлцэл өчиж буйгаа “Twitter” хуудсаараа дамжуулан илэрхийлсэн байна.
Тус компанийн технологийн ахлах мэргэжилтэн Майк Шрёпферын мэдээлснээр, “Facebook”-ийн үйлчилгээнүүдийг эргэн 100 хувь хэвийн болгоход хугацаа шаардлагатай ажээ. Мөн “Instagram”, “WhatsApp” үйлчилгээгээ хэвийн болж эхэлсэн талаар “Twitter” хуудсандаа нийтэлсэн юм.
Одоогоор нийгмийн томоохон сүлжээнүүдийн доголдсон шалтгааныг албан ёсоор мэдээлээгүй байна. Гэхдээ цахим сүлжээний мэргэжилтнүүд домэйн нэрийн системийн /DNS/ алдаатай холбоотой байж магадгүй хэмээн таамаглаж байна.
Эх сурвалж: BBC
