АНУ-д “Merck”-ийн эмийг яаралтай журмаар хэрэглэхийг зөвшөөрчээ
Life Style
АНУ-ын Хүнс, эмийн чанарын хяналтын газар /FDA/ “Pfizer” компанийн “COVID-19”-ийн эмэнд зөвшөөрөл олгосноосоо хойш нэг хоногийн дараа “Merck”-ийн ижил төрлийн эмийг яаралтай журмаар хэрэглэхийг зөвшөөрлөө.
“Молнупиравир” эмийг хүндээр өвчлөх эрсдэл өндөр насанд хүрэгчдэд коронавирусний шинж тэмдэг илэрсэн даруйд уулгах боломжтой. Харин яс, мөгөөрсний өсөлтөд нөлөөлж болзошгүйг харгалзан 18-аас доош насны хүүхдүүдэд хэрэглэхийг зөвшөөрөөгүй байна.
Хүнс, эмийн чанарын хяналтын газрын мэдээлснээр, “Merck”-ийн эм уусан хүмүүсийн долоон хувь нь эмнэлэгт хэвтэн эмчлүүлсэн бол плацебо буюу идэвхгүй нэгдэл уусан хүмүүсийн хувьд энэ үзүүлэлт 10 хувьтай байжээ. Түүнчлэн 30 хоногийн хугацаанд эм уусан нэг хүн, плацебо уусан есөн хүн нас барсан байна.
Уг эм нь коронавирусний генетик кодонд алдаа үүсгэх замаар үйлчилдэг бөгөөд ингэснээр өсөн үржихэд нь хүндрэл учруулдаг ажээ. “Молнупиравир”-ын үр дүнгийн хувьд “Pfizer”-ын “паксловид” эмийнхээс гурав дахин бага гэж олон нийтийн хэвлэл мэдээллийн хэрэгслүүд мэдээлж байна. Мөн жирэмсэн эмэгтэйчүүдэд хэрэглэхгүй байхыг анхааруулж байгаа юм. Эдгээрээс үзэхэд “Pfizer”-ын эмийг илүү түлхүү хэрэглэх бололтой байна.
Хоёр эмийн аль аль нь сүүлийн үед дэлхий даяар тархах болоод буй коронавирусний “омикрон” хувилбарын эсрэг үр дүнтэй гэдгийг холбогдох албаны мэргэжилтнүүд хэлж байна. АНУ-ын Засгийн газар “Merck”-ийн эмээс 3.1 сая хүнийг эмчлэхэд хүрэлцэх эмийг худалдан авна. Уг эмийг өдөрт хоёроор таван хоног ууснаар нэг курс болох бөгөөд энэ нь 700 ам.долларын үнэтэй байна.
Эх сурвалж: VOA
Холбоотой мэдээ
