Өнөөдөр бүтэн сарны хиртэлт болж сар улаан хүрэн өнгөөр туяарна
Дэлхийд
Өнөөдөр буюу 2026 оны 3-р сарын 3-нд сарны бүрэн хиртэлт болох ба энэ нь 2029 он хүртэлх хамгийн сүүлчийн бүрэн сарны хиртэлт юм.
Монгол, Европ, Африк болон Азийн олон хэсэгт энэ гайхалтай «улаан сар» харагдах боломжтой бөгөөд сая сая хүн энэ тэнгэрийн үзэгдлийг ажиглахыг хүлээж байна.
CNN агентлагийн мэдээлснээр, /03.03/ Мягмар гарагт Ази, Австрали, Номхон далайн арлууд болон Америк тивийн оршин суугчид тэнгэрийн ховор үзэгдлийг ажиглах боломжтой боллоо. Бүтэн сарны хиртэлт болох бөгөөд энэ үеэр сар гүн улаан-улбар шар өнгөөр харагдана.
Энэхүү үзэгдлийг олон нийт “цуст сар” хэмээн нэрлэдэг. Энэ нь Дэлхий нар болон сарны хооронд яг шулуун байрлах үед үүсдэг. Ингэснээр Дэлхийн сүүдэр сарны гадаргуу дээр тусч, сар улаан өнгөтэй болж харагддаг гэж NASA мэдээлжээ.
C. Alex Young (NASA-ийн Годдарын сансрын төвийн шинжлэх ухааны харилцаа хариуцсан дэд захирал)-ын хэлснээр, энэ нь дараалсан гурван бүтэн сарны хиртэлтийн сүүлийнх нь юм.
-
Эхний бүтэн хиртэлт 2025 оны 3-р сард
-
Хоёр дахь нь 2025 оны 9-р сард
-
Харин дараагийн бүтэн сарны хиртэлт 2028 оны 12-р сарын 31-нд тохионо
Тиймээс энэ удаагийн үзэгдлийг харах боломжтой бол заавал ажиглахыг тэрбээр зөвлөжээ.
Хэзээ, юуг ажиглах вэ?
Дэлхийн хүн амын ойролцоогоор гуравны нэг нь бүтэн хиртэлтийг шууд харах боломжтой. Сар Дэлхийн сүүдэрт бүрэн орж, “улаан сар” болох үеийг ажиглахад заавал мэргэжлийн дуран хэрэггүй.
“Зүгээр л гадагш гарч, дээшээ хараад энэ гайхамшгийг мэдрэхэд хангалттай” гэж Янг онцолсон байна.
Хэрэв илүү тод харахыг хүсвэл энгийн дуран эсвэл жижиг телескоп ашиглаж болно. Гэхдээ цаг агаарын нөхцөл байдал нөлөөлөх бөгөөд үүлэрхэг бол үзэгдэхгүй байж болзошгүй.
Сэтгэгдлүүд