БНСУ-д олон хоног үргэлжилсэн түймэр бүрэн унтарлаа
Дэлхийд
БНСУ-д олон хоног үргэлжилсэн түймэр бүрэн унтарч голомтод ажиллаж байсан аврах ангийн ажилчид, сайн дурынхан хийгээд гамшигт нэрвэгдсэн олон түмний сэтгэл тэнийв.
Өчигдрийн 18:30 цагийн үед голомт хэсэгт (Uiseong) бороо орж, зургаан хоног үргэлжилсэн түймрийг унтрааж чаджээ. Өмнөд нутагт гарсан түймэрийн хохирлын хэмжээг бүрэн тодорхойлох боломжгүй ба хэдэн зуун тэрбумаар үнэлэгдэх эд хөрөнгөөс гадна дэлхийн өв болсон буддагийн сүм хийд шатсан томоохон осол боллоо. Алслагдсан тосгонд амьдарч байсан иргэдийг нүүлгэн шилжүүлэх үед болон аврах ангийн аврагч гээд 28 иргэн амиа алдсан. 60 гаруй иргэн бэртсэн ба зургаан иргэний биeийн байдал хүнд байгаа гэсэн мэдээ байна. Энэ удаагийн түймэрийг хувь хүний болгоомжгүй үйлдэл буюу оршуулгын газарт арц асаах, тамхины иш хаях зэрэг санамсаргүй байдлаар гарсан гэсэн урьдчилсан таамаглалыг хийжээ. Хаврын урь орж хүчтэй салхитай байснаас түймрийн тархалт олон хоног үргэлжилж, иргэдийг болон эх орныхоо үнэт зүйлийг хамгаалахаар тэмцэж явсан аврах ангийн аврагчид амиа алдсан харамсалтай осол олон гарлаа. Мөн өмнөд нутагт гарсан голомт хэсгээс гадна Сөүл хотод ойр Пажуд, аялал жуулчлалын бүс Чэжү аралд түймэр гарсныг богино хугацаанд унтрааж чадсан байна.
БНСУ-ын Засгийн газраас өндөржүүлсэн бэлэн байдалд долоон хоногийн турш ажиллаж, аврах анги, сайн дурынхан гээд бүхний хүчийг дайчилжээ.
